Categories
new

یاساکانی ژیان

یاساکانی ژیان

  1 -یاساى هۆو بەرەنجام  

هەر شتێك لەبەر هۆیەك روودەدات، بۆ هەر هۆیەك بەرەنجامێك هەیە ء بۆ هەر بەرەنجامێك هۆیەك، یان هۆگەلێكى دیاریكراو. چ زانیاریتان لەبارەیەوە هەبێ و چ نەبێ ، شتێك بەناوى رێككەوت بوونى نیە . 

2 ـ یاساى زەین 

هەموو هۆو بەرەنجامەكان زەینین . بیركردنەوەكان دەبنە واقع و راستى و بەرگى راستیان دەكرێت بەبەردا. بیركردنەوەكانى ئێوە داهێنەرانەن . 

ئێوە دەبنە ئەو شتەى كە زیاتر لە هەموو شتەكانى تر بیرى لێ دەكەنەوە و بە راستى داواى دەكەن و بە دویدا دەگەڕێن . خۆیشتان لە شتگەلێك دوور دەخەنەوە كە خوازیاریان نین . 

3 ـ یاساى بەرجەستەبوونى زەین 

دونیاى دەوروبەرى ئێوە رەنگدانەوەى فیزیكی جیهانى ناوەوەى ئێوەیە . ئیشى سەرەكى ئێوە لە ژیاندا ئەوەیە كە ژیانى ویستراوى خۆتان لە نێو دەروونى خۆتاندا بخوڵقێنن. 

وێناى ژیانى ئایدیالى خۆتان بكەن بە هەموو وردەكایەكانیەوە و تا ئەو كاتەش كە ئەم وێنە زەینیانە لە جیهانى دەوروبەرى ئێوەدا بەرجەستە ببن و بێنەدى ، پارێزگاریان لێبكەن. 

4 ـ یاساى پەیوەندى راستەوخۆ 

ژیانى دەرەوەى ئێوە رەنگدانەوەى ژیانى ناوەوەی ئێوەیە. لە نێوان شێوازى بیركردنەوە و هەستە ناوەكیەكانى ئێوە لە لایەكەوە و كاركرد و ئەزموونە دەرەكییەكانى ئێوەدا لە لایەكى ترەوە، پەیوەندیەكى راستەوخۆ هەیە. 

5 ـ یاساى باوەڕ 

ئەگەر باوەڕێكى تەواوتان بە هەر شتێك هەبێت ئەوا دێتە دى . ئێوە باوەڕ بەو شتە ناكەن كە دەیبینن، بەڵكو ئەو شتە دەبینن كە پێشتر وەك باوەریَِك هەڵتان بژاردووە. كەواتە:

ـ پێویستە دەستنیشانى ئەو باوەڕە سنوردارانە بكەن كە دەبنە ڕێگر لەبەردەم سەركەوتنەكانى ئێوەدا. 

ـ ئەو بەربەستانە تێك بشكێنن و لەناویان بەرن. 

6 ـ یاساى بەهاكان

جۆر و شێوازى كاركرد(رەفتار)ى ئێوە هەمیشە هەماهەنگە لەگەڵ بنەڕەتیترین بەها و باوەڕەكانى ئێوەدا . ئەو شتەى كە بەڕاستى دەربڕى ئەو بەهایانەیە كە ئێوە باوەڕتان پێیان هەیە ، بانگەشە(ادعا) كانى ئێوە نین، بەڵكو ووتە و كردار و هەڵبژاردنەكانى ئێوەن، بەتایبەت لە كاتى توڕەیى و ناڕەحەتیدا. 

7 ـ یاساى پاڵنەر 

هەر شتێك كە دەیڵێن یان ئەنجامى دەدەن لە حەزو ئارەزووە ناوەكیەكان، خواستەكان و رەمەك(غریزە)كانى ئێوەوە سەرچاوە دەگرن . 

نهێنى سەركەوتن دوو شتە : 

ـ دیاریكردنى ئامانجەكان و داڕشتنی بەرنامە بۆیان. 

ـ دیاریكردنى پاڵنەرەكان .    

8 ـ یاساى چالاكى زەینى نائاگا(نەست)

زەینى نائاگاى ئێوە دەبێتە هۆى ئەوەى كە هەموو ووتە و كردارەكانى ئێوە هاوتەریب لەگەڵ ئەو نمونەیەدا ئاڕاستە وەربگرن كە لەگەڵ وێنەى زەینى و باوەڕە بنچینەییەكانى ئێوەدا هاوئاهەنگن. 

زەینى نائاگاى ئێوە بە پشت بەستن بەوەى كە چۆن دایدەڕێژن دەتوانێت ئێوە بەرەو پێشكەوتن ئاڕاستە بكات یان ببێتە ڕێگر لەبەردەم پێشكەوتنى ئێوەدا. 

9 ـ یاساى چاوەڕوانیەكان 

ئەگەر بە متمانە بە خۆبوونێكى زۆرەوە چاوەڕوانى ڕوودانى شتێك بن ئەوا ئەگەرى هەیە لە جیهانى دەوروبەرتاندا ئەو شتە ڕوبدات. 

ئێوە هەمیشە لەسەر بنەماى چاوەڕوانییەكانتان هەڵسوكەوت دەكەن و چاوەڕوانییەكانى ئێوە كاریگەرى لەسەر ڕەفتار و شێوازى مامەڵەكردنتان لەگەڵ دەوروبەر دروست دەكات.  

10 ـ یاساى تەركیز 

هەرشتێك كە تەركیزى تەواوى لەسەر بكەن و بەردەوام بیرى لێبكەنەوە ئەوا لە ژیاندا دەبێتە واقعییەت و پەرە دەسێنێت . 

لەبەر ئەوە پێویستە تەركیزى تەواو بخەنە سەر شتێك كەبەڕاستى خوازیارى بەدەستهێنانى ئەو شتەن . 

11 ـ یاساى خوو 

لانیكەم لە %95ى ئەو كارنەى كە ئەنجامى دەدەن لە خووپێوەگرتنەوەیە، چ خووە باشەكان چ خراپەكان. 

ئێوە دەتوانن ئەو خوانەى كە گەرەنتى بە سەركەوتنەكانتان دەبەخشن پەرە پێبدەن و . دەبێ ئەوەندە كار لە سەر ئەو رەفتارە بكەن تا بگاتە ئەو حاڵەتەى كە ئەو رەفتارە بە شێوەیەكى تۆماتیكى و نائیرادى وازلێبهێنن. 

12 ـ یاساى وەرگرتن 

ئێوە بەردەوام بیروباوەر، ئایدیا و دەرفەتگەلێك كە لەگەڵ بیركردنەوەكانى ئێوەدا دەگونجێن بەرەوە لى خۆتان رادەكێشن چ بیركردنەوەى نێگەتیڤ، چ پۆزەتیڤ . 

ئێوە دەتوانن لەوە باشتر بن كە ئێستاكە هەن . دەوڵەمەندتر لە ئێستابن و توانا گەلێكە زیاتر لە هەنووكەتان هەبێت، چونكە دەتوانن بیركردنەوەكانى خۆتان بگۆرن. 

13 ـ یاساى هەڵبژاردن 

ژیانى ئێوە دەرەنجامى هەڵبژاردنەكانى ئێوەیە . 

لەبەرئەوەى هەمیشە لە هەڵبژاردنى بیركردنەوەكانى خۆتاندا ئازادن ، كۆنترۆڵى تەواوەتى ژیانتان و هەموو ئەو رووداوانەى رووبەرووتان بۆتەوە لە دەست خۆتاندایە. 

14 ـ یاساى بیركردنەوەى پۆزەتیڤ 

بۆ سەركەوتن و خۆشبەختى لە هەموو لایەنەكانى ژیاندا بیركردنەوەى پۆزەتیڤ زۆر زەرورە . 

شێوازى بیركردنەوەى پیشاندەرى بەهاكان ، باوەرەكان و چاوەروانییەكانى ئێوەیە . 

15 ـ یاساى گۆڕان  

گۆڕان شتێكى حەتمیە و لەبەرئەوەى بە هۆى زانستى روولەزیادبوو و تەكنەلۆجیاى پێشكەوتوو ئاڕاستە دەكردێت بە خێراییەكى لەرادەبەدەر لە چاو رابدوودا بەرەو پێشەوە دەروات. 

ئیشى ئێوە ئەوەیە كە مامۆستاى گۆڕان بن نە قوربانى گۆڕان.

16 ـ یاساى كۆنترۆڵ 

ئەوەى كە تا چ رادەیەك دەربارەى خۆتان پۆزەتیڤ بیر دەكەنەوە بەستراوەتەوە بەوەى كە وادەزانن تا چ ئەندازەیەك توانیوتانە كۆنترۆڵى ژیانتان بگرنە ئەستۆ. 

تەندروستى، شادى و كارو چالاكى گەورە لە رێگەى كۆنترۆڵى تەواوەتى بیركردنەوەكان، كردارەكان و بارودۆخى دەوروبەرتانەوە دێتە دى . 

17 ـ یاساى لێپرسراوێتى 

لە هەر شوێنێك كە هەن و هەرچییەك هەن لەبەر ئەوەیە كە خۆتان واتان ویستووە. 

بەرپرسیارێتى تەواوەتى ئەوەى كە هەن، ئەوەى كە بەدەستتان هێناوە و ئەوەش كە دەتانەوێت،  لە ئەستۆى خۆتاندایە.

18 ـ یاساى پاداشت 

جیهان كاتەكانى لە نێو هاوسەنگى و رێكخستنێكى تەواوەتیدا تێدەپەرێنێت. ئێوە هەمیشە پاداشتى تەواوى كردەوەكانتان وەردەگرنەوە. 

هەمیشە لەو دەستەوە كە دەیبەخشن لەو دەستەشەوە وەریدەگرنەوە. ئەگەر لە جیهانەوە زۆر وەردەگرن لەبەر ئەوەیە كە زۆر دەبەخشن . 

19 ـ یاساى خزمەت 

ئەو پاداشتانەى كە لە ژیاندا وەریدەگرن پەیوەندیەكى راستەخۆى بەو خزمەتەوە هەیە كە پێشكەش بە خەڵكانى دەكەن. 

هەرچى زیاتر بۆ باشتر كردنى ژیان و بەختەوەرى ئەوانیتر هەوڵ و تەقەلا بدەن و تواناكانى خۆتان زیاتر پەرە پێبدەن لە بوارەكانى ترى ژیانیشتاندا پێشكەوتنێكى زیاتر بە خۆوە دەبینن. 

20 ـ یاساى كاریگەرى هەوڵدان 

هەموو هیواكان، خەونەكان، ئامانجەكان و ئایدیالەكانتان بە هەوڵ و تێكۆشانەكانتانەوە بە ستراوەتەوە. 

هەرچى زیاتر هەوڵ بدەن چانس و دەرفەتى باشترتان بە نسیب دەبێت . 

هەورامان فەریق